Deling av eigedom

Dersom nokon skal signere på vegne av heimelshavar, må de ha fullmakt for dette. De finn meir informasjon om dette hos Kartverket. 
 

Du må undersøke om det er urådigheiter knytt til eigedomen. Dersom svaret er ja, må du legge ved originalt samtykke til tiltaket frå den eller dei som har denne retten. Ein urådigheit inneber at den som har grunnboksheimel til eigedomen ikkje kan råde fritt over eigedomen, men må ha samtykke frå ein bestemt person for å kunne tinglyse.

Dersom det er urådigheit, må det også bli samtykka til at det kan bli tinglyst nye rettar på eigedomen.

Du må levere samtykke i original versjon. Kommunen sender dette til Kartverket saman med resten av dokumenta når den nye eigedomen blir tinglyst. Vi ber om at de signerer med blå kulepenn. Dette er fordi Kartverket sjekkar at det er original signatur, og blå kulepenn gir klarast bevis for dette.

Du finn meir informasjon i Kartverket sitt eigedomsregister. 

Det må vere klart kva eigedom som skal delast frå.

«Kommaeigedom»:
Eigedom som har fleire bruksnummer. Eigedomane har komma mellom bruksnumra, t.d. gbnr. 1/1,2. Eigedomane må enten bli samanslått (dersom vilkåra er oppfylt), eller grensene må bli klargjort.

Ta kontakt med kart- og oppmålingsavdelinga om du har spørsmål om ein kommaeigedom.

Landbrukseigedomar treng samtykke for å delast. Dette er eit krav etter jordlova. Om du er usikker på om du har ein landbrukseigedom, eller har spørsmål om prosessen, kan du ta kontakt med Bjørnafjorden landbrukskontor. Du kan ta kontakt her.

Om de er klare til å sende søknad etter jordlova, finn de søknadsskjema her. 


 

Byggegrense mot sjø (saltvatn) er 100 meter. Det kan vere sett annan byggegrense i kommuneplanens arealdel eller reguleringsplan. Dette vil då enten stå i planføresegna, eller vere vist som «juridisk linje» i plankartet. Her finn du kommunekart med plankart. 

Det gjeld også byggegrense mot vatn større enn 10 daa på Fusa-sida av kommunen. Det er unntak for Henangervatnet, Skogseidvatnet og Gjønavatnet. Byggegrense her er 50 meter.

Det kan også vere sett byggegrense mot vassdrag på begge sider av kommunen. Ta kontakt med byggesaksavdelinga om du er usikker.

Arealformålet må samsvare med det du skal dele til. Om du t.d. vil dele frå ein bustadeigedom er «rett» arealformål bustad. Om ønska frådeling og gjeldande arealformål ikkje er i samsvar, må du søke om dispensasjon. Det same gjeld om området er uregulert og unntak frå plankrav ikkje gjer seg gjeldande. 

Her finn du søknadsskjema for dispensasjon, med rettleiing. 

Her finn du kart med plangrunnlag. 

Er du usikker? Ta kontakt med byggesaksavdelinga.

Du må ha førehandsuttale frå VA-avdelinga dersom formålet med tomta er bygg for varig opphald – med dette meiner vi t.d. bustad, fritidsbustad, kontorbygg eller andre bygg kor menneske oppheld seg over tid. Grunnen til dette, er at ein frådelt eigedom skal kunne byggast på. Dersom det ikkje er mogeleg å få godkjent vatn og avløp, kan ikkje eigedomen bli delt frå.

Du må ha godkjenning til bruk av avkøyrsle til næraste offentlege veg. Dette er enten den offentlege vegen du har avkøyrsle ut i, eller den første offentlege vegen du kommer til etter å ha køyrt på privat veg. Søknadsskjema finn de her. 

Dersom den nye eigedomen skal ha rett til å leggje leidningar eller veg over ein annan eigedom, eller nytte eksisterande anlegg, må de leggje ved utfylt skjema for erklæring om rettighet i fast eigedom. Vi ber om at de signerer med blå kulepenn. 

Vi må ha original versjon av dokumenta. De leverer disse til kommunen, som sender inn skjema når den nye eigedomen blir sendt til tinglysing. 

Under pkt. 3 fyllar de ut kommunenr. 4624, kommunenamn Bjørnafjorden, men de lar gnr. og bnr. stå tom. Vi fyller dette på når den frådelte teigen er tildelt gards- og bruksnummer.

Raud – du fyller ut, blå – kommunen fyller ut

Skildringa av retten skal innehalde setninga «Kan ikkje slettast utan samtykke frå Bjørnafjorden kommune, org.nr. 844 458 312». Grunnen til at vi ber om dette, er at ein ikkje skal kunne slette rettar som er grunnlag for vedtak om deling. Om rettane fell bort, har ein ikkje nødvendig grunnlag for å kunne bygge på eigedomen seinare.

Vi oppmodar om at de legg ved eit kart som visar kor retten ligg på eigedomen. De kryssar då av for «ja» på spørsmål om vedlegg. Det må vere eit eiget kart som skal leggast ved i original. De kan gjerne signere kartet. 

Utgreiing av naturfare skal liggje ved søknad om deling. I ein delesak må du derfor dokumentere om det er trygt nok å dele tomta (kan det vere naturfare?).

Ut frå plan- og byggingslova og byggteknisk forskrift (TEK) må det vurderast om eigedomen er tilstrekkeleg trygg for formålet for delesaken. Aktuelle naturfarar  er ras- og skred (TEK17 § 7-3), områdeskred (kvikkleire) (TEK17 § 7-3) og flaum (TEK17 § 7-2).

Det er tiltakshavar som har ansvar for å dokumentere trygg grunn og det er kommunen sin rolle å sjekke om tiltaket/delesaka oppfyller kravet til tryggleik. Dersom du ikkje kan dokumentera at det er trygt å dele frå til byggeformål, er plan- og bygningslova § 28-1 ein sjølvstendig avslagsheimel.