Tenesta tar utgangspunkt i måla dine, og kva evne og føresetnader du har for å ivareta eigenomsorg. Heimesjukepleia vil legge til rette for at du skal klare mest mogleg sjølv, slik at du kan halde fram med å bu heime.
Heimesjukepleia kan hjelpe deg med:
- Rettleiing for å auke eiga meistring i kvardagen
- Opplæring i bruk av hjelpemiddel
- Oppfølging av ernæring
- Å ta vare på eiga helse, t.d. sårbehandling og medisinoppfølging
- Hjelp til personleg hygiene
- Omsorg og pleie ved livets slutt
Du kan få heile eller delar av tilbodet digitalt. Korleis tenesta blir levert, blir avgjort i samarbeid med heimetenestene.
Les meir om digital heimeteneste her
Kven kan få tilbodet?
Du kan få innvilga heimesjukepleie dersom helsetilstanden eller funksjonsevna tilseier at du:
- ikkje sjølv kan dekke grunnleggande pleie- og omsorgsbehov
- ikkje kan nytte multidoseordning som du sjølv har ordna via apotek
- ikkje kjem deg til fastlegen for t.d. injeksjonar eller sårstell
Lovgrunnlag
Du kan lese om rettane dine i pasient- og brukarrettigheitslova §2-1 a andre ledd jf. helse- og omsorgstenestelova §§3-1 og 3-2 første ledd nr. 6 bokstav a.
Dette kan du forvente av oss i heimesjukepleia
- Vi behandlar deg og heimen din med respekt
- Vi har synleg legitimasjon.
- Vi overheld teieplikta
- Du får tildelt ein primærkontakt
- Akutte hendingar kan føre til at vi ikkje klarer å vere hos deg til ønska tid. Derfor kan vi heller ikkje avtale nøyaktig tid med deg.
- Heimesjukepleia kan ikkje følgje deg til lege, tannlege, frisør, fotpleiar og liknande. Treng du skyss til legen, må du ta taxi eller få nokon andre til å følgje deg. Kontakt fastlegekontoret ditt for å avklare om du kan få gratis taxi til timen.
- Vi jobbar turnus, og derfor vil du ikkje alltid møte dei same tilsette kvar dag.
Dette forventar vi i heimesjukepleia av deg
- Du gjer dei oppgåvene du klarer sjølv
- Du må sikre at heimesjukepleia kjem seg inn hos deg
- Du gir beskjed om du ikkje er heime eller må avlyse avtalen, helst via Innbyggardialog på Helsenorge
- Du legg til rette i heimen for etablering av nødvendige hjelpemiddel dersom det er nødvendig
- Du held kjæledyr i band eller inne på andre rom medan vi er hos deg
- Du har mikrobølgeomn viss du treng hjelp til/skal trene på å varme middag
- Dei tilsette har rett til eit røykfritt arbeidsmiljø. Det vil seie at du ikkje kan røyke når vi er hos deg, og at du må lufte godt ut på førehand dersom du røyker.
- Du sikrar at bustaden er lett å finne (utelys,namn og husnummer ved ytterdøra) og tilgjengeleg på vinteren (brøyting og strøing)
- Dersom du har tryggleiksalarm, brukar du han berre i situasjonar som ikkje krev nødtenester. Tryggleiksalarmen erstattar ikkje nødtenester, og ved behov for akutt hjelp må du alltid ringe 113.
- Du ringer heimesjukepleia innanfor telefontidene, som er kl. 10-12 og kl. 13-15 på vekedagar. Om kvelden og i helgene er alle våre tilsette ute hos pasientar, og er berre tilgjengelege for korte beskjedar
- Dersom du mottar hjelp frå to eller fleire instansar i kommunen, kan det vere aktuelt med individuell plan eller koordinator.
- I samband med søknaden din treng vi vanlegvis å kartlegge funksjon og moglegheit for tilrettelegging i heimen din.
- Hjelpebehovet ditt blir jamleg vurdert av fagpersonar i heimetenestene. I tråd med korleis behovet ditt endrar seg, kan tenesta bli redusert, auka eller avslutta.
- Dersom vi er inne i heimen din med tenester over tid, ønskjer vi at det blir inngått ein pårørandeavtale for tydeleg rolleavklaring.
Kva kostar tenesta?
Du betaler ikkje eigendel for heimesjukepleie.
Avdeling for forvaltning og koordinering i Bjørnafjorden kommune er ansvarleg for kartlegging, saksbehandling, vedtak og forvaltning, medan heimetenestene er ansvarlege for den praktiske gjennomføringa av tenesta.
Slik kontaktar du heimesjukepleia
Send melding via helsenorge.no
Du som får heimesjukepleie, kan logge inn på helsenorge.no for å sende meldingar til heimetenestene i Bjørnafjorden kommune. Her kan du sjå oversikt over planlagte og gjennomførte heimebesøk, i tillegg til å avbestille heimebesøk dersom du er bortreist. Dette kan òg pårørande gjere for deg, ved at du gir dei fullmakt. Sjå korleis du går fram på helsenorge.no.
Send oss melding via Helsenorge
Telefon
Her finn du oversikt over telefonnummer og telefontider for avdelingane i heimetenestene
Vanlege spørsmål og svar om heimesjukepleie
Kan heimesjukepleia følgje eller køyre meg til legen?
Nei, dette er ikkje ei oppgåve for heimesjukepleia. Treng du skyss til legen, må du ta taxi åleine eller få nokon andre til å følgjedeg. Kontakt fastlegekontoret for å avklare om du kan få gratis taxi til timen.
Kan heimesjukepleia lage mat til meg?
Vi smører brødmat og varmer ferdiglaga middag dersom du har eigen mikrobølgeovn.
Kvifor kjem det ulike tilsette til meg?
Dei tilsette jobbar turnus, og derfor vil ikkje den same kome på jobb kvar dag.
Kvifor kjem ikkje dei tilsette til same tid kvar gong?
Arbeidsdagen vår varierer, og ingen dag er lik den andre. Derfor kan vi ikkje avtale ei nøyaktig tid med deg.
Kvifor kan ikkje heimesjukepleia til dømes ta med avisa mi inn?
Det du klarer sjølv bør du gjere sjølv for å oppretthalde helse og funksjon.