Brukarstyrt personleg assistanse

Kva går tenesta ut på?

BPA er ein alternativ måte å organisere den hjelpa som tradisjonelt kunne vore gitt som praktisk bistand og støttekontakt, pluss avlasting.   

Med BPA er det du eller ein av dine næraste som lærer opp og leier assistentar som hjelper deg i kvardagen. Du får eit timetal for ein periode, vanlegvis for eit år, og du må sjølv planlegge bruken av timane slik at dei dekker den hjelpa du treng.  

Du får tildelt ein personleg assistent for eit gitt timetal, og bestemmer i prinsippet sjølv kva du ønskjer og treng hjelp og assistanse til.

BPA kan hjelpe deg med  

• praktiske gjeremål som matlaging, reinhald og klesvask  
• personleg stell  
• fritidsaktivitetar 
• avlasting til føresette med barn under 18 år med nedsett funksjonsevne og stort hjelpebehov 

Brukaren er arbeidsleiar for assistenten/-ane

Det betyr at du, eventuelt med hjelp frå familiemedlemmer eller andre nærståande, har ansvar for:

• Organisering og innhald i tenesta
• Å sette opp arbeidsrutinar og utarbeide arbeidsplanar
• Å gjennomføre personalsamtalar, følgje opp timeregistrering og elles følgje opp reglane i arbeidslivet.
• Hovudansvaret i rekrutterings- og tilsettingsprosessane, gjennom annonsering, intervju og utvelging av assistentane

Kven kan søkje om brukarstyrt personleg assistent?

Du har rett til å få hjelpa organisert som BPA dersom du:

• er under 67 år og har eit langvarig behov for personleg assistanse, minst 32 timar per veke. 
  • Med langvarig meiner vi over to år. 
  • Vi har også plikt til å vurdere om det er hensiktsmessig å organisere personleg assistanse som BPA, sjølv om hjelpebehovet ditt er mindre enn 32 timar i veka.  
  • Har ønske om, og kapasitet til, å vere arbeidsleiar for assistentane. Vi kan unntaksvis godkjenne at ein annan person er leiar for ordninga, t.d. ektefelle eller føresett. 

Slik vel du assistent

Bjørnafjorden kommune har avtale med fleire firma som kan levere BPA-assistentar. Du som får innvilga vedtak om BPA, kan sjølv velje blant desse leverandørane. Hugs at det ofte er oppseiingsfrist på tre månadar frå leverandøren du brukar i dag. 
Her finn du oversikt over leverandørane Bjørnafjorden kommune har avtale med.

Dette er ansvaret ditt

• Lokala må vere eigna til å ha denne typen tenester, og dei tilsette skal ha tilgang på toalett og moglegheit til å ta pause i eit eige rom. 
• Du må tilrettelegge arbeidsplassen for assistentane i samsvar med krav i arbeidsmiljølov og HMS-forskrift. Det gjeld m.a. retten til eit røykfritt arbeidsmiljø. 
• Som hovudregel må du sjølv ta på deg ansvaret med å leie ordninga. Det vil seie å lage timeplan, leie assistentane og føre timelister, m.m. 
• Du må lære opp assistentane dine 

Kva kostar tenesta?

Du betaler eigendel for heimehjelpsdelen av tenesta. Sjå oversikt over kommunale gebyr, prisar og avgifter.

Prisane blir fastsette årleg av kommunestyret i Bjørnafjorden.

Slik søkjer du 

• Du treng ein legeattest for å søkje
• Send inn digitalt skjema Søknad om helse- og omsorgstenester (du må logge på med BankID)
• Eller du kan sende skjema per post ved å fylle ut PDF-skjema søknadsskjema for helse- og omsorgstenester (DOCX, 63 kB) Kryss av for dagopphald. Skriv ut skjemaet, skriv under og send skjemaet til Bjørnafjorden kommune, avdeling for forvaltning og koordinering, pb 24, 5649 Eikelandsosen. Dersom det er andre som søkjer for deg, må du legge ved fullmakt.

Lovgrunnlag

Du kan lese om rettane dine i pasient- og brukarrettigheitslova § 2-1 d, jf. helse- og omsorgstenestelova §§ 3-2 første ledd nr. 6 bokstav b og 3-8.